Unións Agrarias manifesta o seu rexeitamento frontal, ao novo recorte que sofren os fondos destinados á idemnizacións dos danos da fauna salvaxe, que figuran no Anteproxecto de Orzamentos da Consellería de Medio Ambiente, Ordenación do Territorio e Infrestruturas para o ano 2013, que prevén unha partida ridícula de apenas 110.000 euros, para o pago dos danos da fauna salvaxe en toda Galicia para o ano 2013.
Esta partida, que chegou a contar cun orzamento próximo aos 900.000 euros no ano 2009, xa entón era insuficiente para cubrir os danos das mandas de xabaríns nos prados e cultivos. Dende esa data sufriu unha serie de drásticos recortes, que fixo que descenderán ata os 128.000 euros do ano 2012, e que dende o ano 2010 se limitara únicamente ao pago dos danos do lobo, unha vez que a Xunta tomou a decisión de que agricultores e gandeiros correrán co custe de manter o xabarín.
Na actualidade os 128.000 euros dedicados ao pago dos danos do lobo son insuficientes para atender todas as solicitudes de idemnización, sendo numerosas as queixas de gandeiros afectados que aínda teñen pendentes de cobro dos expedientes do 2012.
Os ataques do lobo son cada máis frecuentes debido á falta de alimento que sufre o lobo pola obriga da retirada do gando morto no monte, forzado pola lexislación comunitaria, trala crise das vacas tolas, o que impide a tradicional práctica dos muladares. Tamén polo aumento do manexo extensivo do gando, e polo crecemento das propias manadas de lobos en Galicia.
A propia Unión Europea manifestou recentemente a preocupación polo aumento de danos na cabana gandeira de Galicia debidos ao ataque do lobo, e animaba a tomar medidas para conciliar a conservación deste animal, coa práctica da gandería, para o cal os mecanismos de idemnización de danos son unha peza fundamental.
Unións Agrarias fará chegar aos diferentes grupos políticos no Parlamento de Galicia, unha proposta de emenda nos próximos días, a fin de que se aumente esta partida orzamentaria, para que sexa posible conciliar a conservación do lobo cos dereitos dos gandeiros a sacar adiante as súas explotacións e o pan das súas familias, nun momento económico especialmente delicado para a gandería de leite e carne.
Deja un comentario