Santiago, 20 de marzo de 2007 A Sectorial Láctea de Xóvenes Agricultores reunida e Santiago considera unha “grave provocación” o anuncio das empresas de baixar o prezo do leite en orixe, baixada que, de aplicarse, suporía unha perda estimada en 2,5 millóns de euros ao mes. Na mesma reunión –preparatoria do encontro a manter mañán cos empresarios e a Consellería–, acordouse reclamar do departamento que dirixe Suarez Canal que chame ao orde ás industrias. Tamén se barallaron as diversas accións de protesta a levar a cabo, caso de que se confirme a ameaza das industrias, protestas que en todo caso serán “contundentes”.

Obviamente, na reunión de mañán, a postura de Xovenes Agricultores será de oposición frontal á decisión unilateral das empresas, ao entender que a súa decisión responde únicamente a criterios de mellora a sua conta de resultados a costa das xa menguadas rendas dos gandeiros, e sin que existan razóns de producción nin de mercado que o xustifiquen.

De levarse a cabo a ameaza, como xa se fixo noutras comunidades do Estado, os gandeiros galegos deixarían de percibir uns 2,5 millóns de euros para o leite entregado no mes de marzo. Neste momento o prezo que reciben os productores é de 0,30 €, e a industria pretende situalo por debaixo de 0,29 €.

A baixa unilateral do prezo do leite se entende menos ainda cando os mercados europeo e mundial están á alza, en Francia subiu o leite nos primeiros meses deste ano, e os excedentes lácteos rebaixáronse de forma moi importante.

Os devanditos datos veñen a demostrar que a industria pretende claramente impor unilateralmente unha decisión cando o mercado mundial vai noutra dirección, coa única razón de peso de que “como sempre baixou no mes de marzo, este ano tamén”, argumento máis ben propio dunha cantiga de entroido.

Dende Xóvenes Agricultores esiximos un mínimo de seriedade da industria, e insistimos en que non imos consentir decisións caprichosas e sen ningún sentido. Nesa dirección faremos todo o que estea nas nosas mans para impedir unha nova tomadura de pelo da industria aos gandeiros da nosa comunidade e fomentaremos a unidade de acción co resto das organizacións profesionais agrarias.

Doutra banda, instamos á Consellería do Medio Rural a que non permaneza impasible ante ista situación de clara imposición da industria, e poña a funcionar os medios ó seu alcance, Mesa do Leite incluída, para evitar que moitas explotacións galegas, que acaban de asumir unha importe incremento nos custos de producción con subas do penso e coa compra de cota ó Ministerio de Agricultura, se vexan abocadas a unha situación difícil, que o único que conseguiría é que o abandono do rural fora cada vez maior.