As limitacións convocatoria de axudas da xunta poden deixar fora o 70% das explotacións gandeiras

As limitacións debidas á exclusión das reformas, así como a imposibilidade de solicitar para a mesma inversión durante 5 anos, supón un importante obstáculo para a mellora das explotacións, que ven así imposible ampliar o número de animais ou incluso reducir os custos de produción debido a estas limitacións.

O encaixonamento das axudas, está a provocar que moitos gandeiros desistan de facer inversións que supoñerían unha importante redución nos custos de produción, tales como silos, fosas de purín, novas ampliacións de cortes, por telo solicitado nos últimos 5 anos.

Para o sindicato Unións Agrarias este modelo condena as granxas galegas a perda de competitividade por falta de innovación, fronte a outras zonas produtoras do Estado. Esta falta de compromiso co sector primario por parte da Xunta de Galicia ten a proba máis contundente na falta de resposta do presidente Feijoo a sentarse coas organizacións agrarias para atopar unha solución agónica na que se atopa o sector.

Sorprende o desinterese de Medio Rural cando sabe que esta liña de axudas é a principal porta para a incorporación de xente nova ó agro así como para a modernización e redución de custes das explotacións. Para Unións Agrarias esta maneira de desentenderse da mellora do medio rural por parte do goberno de Feijoo xa quedou patente no 2011 onde se denegaron o 50% dos plans de mellora e se reduciu nun 10% o importe subvencionado dos aprobados.

Nos plans de melloras Xunta e Ministerio so aportan o 21% xa que o resto corresponde a financiamento europeo, polo que resulta inexplicable a actitude cicatera da Consellería que impide que chegue investimento ao medio rural galego. Hai que lembrar que as preto de 1.000 explotacións que se poden beneficiar anualmente destas axudas, deben investir nas melloras como mínimo o dobre da subvención recibida, un montante que vai a empresas do medio rural axudando a crear emprego.