O secretario xeral de Unións Agrarias Roberto García e o secretario de Gandería de UPA, Román Santalla mantiveron hoxe unha reunión de traballo co director xeral de Industrias Agroalimentarias, Fernando Burgaz do Ministerio de Agricultura na que se lles recoñeceu o bloqueo do Ministerio de Economía a introdución de melloras no trámite parlamentario a Lei da Cadea Alimentaria. Unhas melloras que xiraban sobre a necesidade de habilitar unha fórmulas que impedisen que os gandeiros teñan que vender o leite por debaixo de custes.

Neste contexto o presidente da Xunta de Galicia ten a obriga de abandonar o papel de mero observador, e remangarse politicamente para frear este despropósito que se pode levar por diante a todo o sector lácteo galego. Do contrario botaría por terra os acordos asinados o pasado 7 decembro de 2012 e deixaría moi comprometida a súa lexitimidade como presidente ó antepoñer a disciplina de partido sobre os intereses de Galicia.

UUAA, e con ela todo o sector, é consciente que só desde un marco legal claro, completo e contundente se poña fin a mecánica de venta a perdas que a distribución francesa leva perpetrando con total impunidade para afogar ao sector produtor galego e quedarse con tada a cota de mercado. Non ten pois ningunha utilidade o chamado Código de Boas Prácticas posto que tal como está definido non ten carácter disuasorio para as firmas comerciais que o incumpran xa que se basea unicamente na boa vontade.

Do mesmo xeito, hai que protexer a parte máis débil da cadea do leite como son os produtores e para iso é imprescindible a figura do mediador que fixe unha arbitraxe xusta no caso de desacordo en prezo entre industria e produtor polo que é evidente que a Administración renuncia a intervir para favorecer unha concreción equilibrada na cadea de valor do leite.

Unións Agrarias xa acusou semanas atrás a Comisión Nacional da Competencia de ter unha clara intención de reabrir o conflito no sector lácteo cun informe que era unha emenda a totalidade da futura Lei da Cadea Alimentaria promovida polo Ministerio de Agricultura, xa que todas e cada unha das súas argumentacións ían encamiñadas a que industrias e distribución non teñan a ameaza sequera do tímido réxime de sancións proposto pola normativa impulsada por Arias Cañete.