O sindicato Unións Agrarias vén de advertir a cadea de distribución alemá Lidl que cese de inmediato a campaña de uso como produto reclamo da carne de polo dado o impacto negativo que está a producir na cadea de valor da produción avícola galega. Nas dúas últimas semanas, a citada marca está sacando aos lineais do seus supermercados polo por debaixo de 2,19 euros/kilo o que supón un claro caso fraude por venda a perdas.

UUAA acaba de solicitar unha reunión urxente coa distribuidora Lidl para trasladarlle o malestar dos avicultores polas prácticas abusivas que sofren e anunciarlles o traslado a Agencia de Información y Control Alimentarios –dependente do MAGRAMA- e do Instituto Galego de Consumo e Competencia un informe elaborado polos técnicos do sindicato en todas as Comunidades autónomas no que se detecta o movemento especulativo a nivel de todo o Estado da cadea Lidl para alterar as normas de mercado.

Para a organización agraria resulta especialmente preocupante a situación que esta política de destrución de prezos vai a supoñer para os centos de explotacións avícolas de Galicia que levan meses no límite da supervivencia polo contínuo incremento dos custes de produción sobre todo despois dos tarifazos tanto da enerxía eléctrica e os combustibles. Hai que ter en conta que segundo o Estudo da Cadea de Valor que elabora o Ministerio de Agricultura anualmente, fixa para 2011 -tendo en conta os custes- un prezo de referencia para a venda que non debe ser inferior 2,73 euros/kilo.

Unha situación que desde 2013 xa provocou o peche de 120 granxas e perdas no sector de máis 50 millóns o que está poñendo en perigo máis de 5.000 empregos dada a situación financeira que atravesan e produtores, fábricas de penso, matadoiros, industrias de transformación, etc. Os avicultores de polo avisan, que no caso dun peche masivo das granxas as cadeas de distribución terían que abastecerse con carne de terceiros países que non teñen as mesmas esixencias e garantías sanitarias que o requirido pola normativa europea, o que iría en prexuízo dos consumidores.