Logo de coñecer que a Comisión Nacional da Competencia amplía a outras oito industrias lácteas a apertura de expediente sancionador por acordar un reparto de mercado, UUAA manifesta en primeiro lugar a súa satisfacción porque a denuncia que esta organización agraria trasladou xa en febreiro de 2011 ao Consello Galego da Competencia, está tendo un recorrido que avala as criticas contra unha prácticas ilegais coas que as industrias pretendían someter ao produtores.

Agora ben, esta decisión de Competencia chega nun momento inoportuno, xa que nas últimas semanas dende Unións Agrarias lle trasladamos ao órgano de arbitraxe unha proposta de resolución negociada que supuxera a asunción dunha serie de compromisos por parte das industrias investigadas. Estes compromisos serían o cumprimento do establecido no Paquete lácteo: contratos de 1 ano de duración, negociación das condicións dos contratos, mediador en caso de conflito, etc

Chama a atención que a pesar de que a denuncia de UUAA apuntaba tamén cara ás empresas de distribución alimentaria, a CNMC mirou cara outro lado e non expedientou aos culpables de «prostituir» a formación de prezos no sector lácteo. Ao utilizar o leite por debaixo do custo de produción como produto reclamo. O sindicato considera que a CNMC preferiu aplicar unha sanción ás industrias para resolver a balanza do ministro de Facenda, Cristóbal Montoro a permitir a terminación do expediente co compromiso das industrias.

Neste sentido, tivera sido máis positivo para o sector lácteo a aplicación do mecanismo coñecido como «Terminación convencional» establecido na Lei de defensa da competencia. Esta fórmula é unha forma de finalización do expediente sancionador, na cal a CNMC resolve poñer fin ao procedemento sancionador facendo vinculantes uns compromisos ofrecidos voluntariamente polo presunto infractor, sen necesidade de que se produza unha declaración sobre a acreditación da infracción, nin conseguintemente, se impoña unha sanción.